أنا نسيت أهم حاجة في FIFA 2005 وهي اللي بيسموه First Touch أو "اللمسة الأولى"... و دي حاجة أول مرة تنزل في FIFA ...

الدرس الخامس - اللمسة الأولى :

و هي الحركةاللي هاتلمس بيها الكورة أول ما توصل في رجلك من باصة أو رفعة ...
هي بتتم بزرار الShift مع الاتجاهات ...

و الكورة جايالك ... سواء على الأرض أو في الجو ... افضل دايس على Shift و دوس على أي اتجاه ... و افضل دايس على Shift+الاتجاه لغاية لما يستلم براحته خالص ...

الاستخدام:
لو بعد ما باصيت أو رفعت لمهاجم و لقيت واد مدافع رذل من الخصم واقف قريب منه ... استلم في عكس اتجاه حركة المدافع ... يعني لو المدافع يمينك استلم على شمالك ... لو المدافع بيحاول يتحرك قدامك استلم لورا ... هاتلاقي المدافع هناااك ...
خلي بالك لازم يكون المدافع كان قريب منك جدا لأنه لو كان بعيد عنك يبقى مالهاش لزمة و لو كان قريب بس مش قوي يبقى انت بتديهاله ...

أهم حاجة و أصعب حاجة هي هاتستلم في أي اتجاه ...حاولوا تتدربوا عليها في ماتش تدريب كامل العدد للفريقين ...

و كمان حاولوا تشوفوا الفيديوهات دي من EA SPORTS كانت اعلانات ل FIFA 2005 و فيها الحاجات دي ... حاولوا تشوفوا First Touch In Action ...

لو عايز الحكم و حامل الراية يظهروا في الملعب ...

1- روح للـ Folder بتاع FIFA 2005

2- خش في data\cmn folder

3- افتح الملفين اللي اسمهم cfg_pc_h.ini و cfg_pc_m.ini باستخدام برنامج notepad

4- تحت السطر اللي مكتوب فيه Default// ، ضيف السطرين دول:
FEATURE_INGAME_REFEREE_ENABLED=1
FEATURE_INGAME_LINESMEN_ENABLED=1

5- احفظ الملفين و شغل اللعبة ...

6- لو لقيت ده قلل من أداء اللعبة (سرعتها - بتقطع - ...) ... امسح السطرين من الملفين ...

أنا بصراحة ماجربتش الطريقة دي ... لكنها من EA SPORTS نفسها ... يعني مضمونة 100%

يا ريت يا جماعة اللي يعرف أي حاجة تانية في اللعبة يفيدنا بيها و شكرا ليه مقدما ...

الحركات دي لسه مكتشفها حالا :

الدرس السادس - الدفاع :
الكورة مع الخصم و داخل بيها على جونك ... قال ايه عايز يجيب جون ...

D : زي ما قلنا بيدخل يحاول ياخد الكورة منه ... بس الجديد ان انت لو فضلت دايس على الـ D هايجري عليه و ياخد الكورة منه من غير ما انت توجهه ...

E+D : افضل دايس عليهم ... هايجري على المهاجم بسرعة ...

Q : زي ما قلنا بينده واحد تاني يخش معاه على المهاجم ... لو فضلت دايس عليه هاتلاقي واحد تاني (انت مابتتحكمش فيه) داخل على المهاجم بيحاول يخطف الكورة منه ...

E+D+Q : هاتلاقي اتنين داخلين على المهاجم ... لو عدى من واحد هايلاقي التاني في وشه ... الطريقة دي مضمونة لخطف الكورة ... بس عيبها الوحيد انك بتسحب لعيب من بتوعك و ده ممكن يخلي مهاجم تاني واقف لوحده ... فلو المهاجم اللي انت داخل عليه ادهاله بينية هايبقى انفراد ...